Fulltrúar Sjálfstæðisflokksins í bæjarráði leggja til að unnið verði að því að hagræða og einfalda stjórnskipulag Hafnarfjarðar. Jafnframt að laun og kjör bæjarstjóra, bæjarfulltrúa og fulltrúa í ráðum og nefndum verði tekin til endurskoðunar og miðað að því að lækka kostnað af þeim útgjaldalið um allt að 15% á árinu 2009.
Greinargerð Fjárhagstaða Hafnarfjarðarbæjar er mjög þröng og miklar skuldir hvíla á bæjarfélaginu. Fyrirséð er mikil tekjuskerðing bæjarins sem verður að mæta með niðurskurði og við þær aðstæður er eðlilegt að stjórnkerfi bæjarins gangi á undan með góðu fordæmi. Gengið verði til verks með einföldun á stjórnkerfi bæjarins eins og bæjarfulltrúar Sjálfstæðisflokksins hafa lagt til undanfarin ár við afgreiðslu fjárhagsáætlunar.