Borist hafa upplýsingar um ólöglega búsetu í húsinu. Einnig að húsið sé enn skráð á byggingarstigi 1 og að lögboðnar úttektir hafi ekki farið fram, þar á meðal fokheldisúttekt. Skipulags- og byggingarfulltrúi gerði 20.05.2009 eigendum skylt að veita upplýsingar um málið innan tveggja vikna. Bærust þær ekki yrði málinu vísað til skipulags- og byggingarráðs með tillögu um viðeigandi aðgerðir skv. skipulags- og byggingarlögum. Svar barst ekki. Skipulags- og byggingarfulltrúi vísaði 10.06.2009 málinu til skipulags- og byggingarráðs. Skipulags- og byggingarráð gerði 23.06.2009 eigendum skylt að veita upplýsingar um málið innan tveggja vikna. Bærust þær ekki innan þess tíma mundi skipulags- og byggingarráð gera tillögu til bæjarstjórnar um að beitt verði dagsektum skv. 57. grein skipulags- og byggingarlaga nr. 73/1997 þar til bætt verður úr. Lagðir fram minnispunktar skipulags- og byggingarsviðs, þar sem fram kemur að beðið hefur verið um frest til að bregðast við málinu þar til unnt er að halda húsfund, sem hefur verið boðaður 07.09.2009. Skipulags- og byggingarráð féllst á að veita umbeðinn frest. Frekari skýringar bárust ekki að þeim tíma liðnum. Greint frá fundi skipulags- og byggingarsviðs með Ívari Erlendssyni fulltrúa eigenda hússins, sem neitaði því að þar væri búseta, en varnaði skoðunarmanni inngöngu til að sannreyna það. Skipulags- og byggingarfulltrúi vísaði því til skipulags- og byggingarráðs, sem samþykkti eftirfarandi 20.10.2009: "Skipulags- og byggingarráð gerir kröfu um að byggingarstjóri verði settur á húsið innan tveggja vikna og boði þá þegar til stöðuúttektar. Einnig gerir skipulags- og byggingarráð þá kröfu að eftirlitsmanni skipulags- og byggingarsviðs verði tafarlaust veittur aðgangur til að sannreyna hvort búseta sé í húsinu. Verði ekki brugðist við hvoru tveggja innan tveggja vikna mun skipulags- og byggingarráð gera tillögu til bæjarstjórnar um að beitt verði dagsektum í samræmi við 57. grein skipulags- og byggingarlaga nr. 73/1997." Lagt fram bréf frá Ívari Erlendssyni dags. 06.11.2009, þar sem farið er fram á eins mánaðar frest til að skila inn reyndarteikningum af húsinu og framkvæma tilskyldar úttektir. Bréfritari telur óþarft að veita eftirlitsmanni aðgang að húsinu til að rannsaka hvort búseta sé í húsinu, og segir að byggingarstjóri verði settur á húsið (ótímasett). Erindið var til umfjöllunar á afgreiðslufundi skipulags- og byggingarfulltrúa 04.11.2009, sem telur að nógir tímafrestir hafi þegar verið veittir, og leggur til við skipulags- og byggingarráð að málinu verði fram haldi eins og lagt var til á fundi ráðsins 20.10.2009. Þ.m.t. að eftirlitsmanni byggingarfulltrúa verði tafarlaust veittur aðgangur að húsinu til að kanna hvort þar sé búseta.