Fyrirspurn
Með tilvísun í meðfylgjandi áætlun dagsettri 20.02.2013 leggur starfshópurinn til að bjóða út byggingu hjúkrunarheimils við Hádegisskarð í Hafnarfirði. Útboð mannvirkja (bygging og lóð) verði með hefðbundnum hætti þ.e. hönnun boðin út sér og í framhaldi af því mannvirkin sjálf. Kappkostað verði að byggingin uppfylli allar þær kröfur sem gerðar eru til nútíma hjúkrunarheimila í dag. Ennfremur að tekið verði tilliti til kostnaðarsjónarmiða bæði er varðar bygginguna sjálfa og rekstur innan hennar m.t.t. þeirrar þjónustu sem íbúum hjúkrunarheimilisins verður veitt.
Skipuð verði verkefnastjórn sem sjái um ofangreind útboð og eftirfylgni með þeim. Horft verði m.a. til samnings um byggingu og þátttöku í leigu hjúkrunarheimilis fyrir aldraða í Hafnarfjarðarkaupstaði sem undirritaður var 3. maí 2010. Í þeim samningi kemur fram að um sé að ræða hjúkrunarheimili fyrir 60 íbúa, við hönnun skal hinsvegar líka taka tillit til hugsanlegar stækkunar hjúkrunarheimilisins í framtíðinni og þeirrar stoðþjónustu sem tengst gæti starfsemi þess í byrjun eða í náinni framtíð. Samkvæmt fyrrgreindum samningi um byggingu og þátttöku í leigu hjúkrunarheimilis fyrir aldraða í Hafnarfjarðarkaupstaði sem undirritaður var 3. maí 2010, skal Hafnarfjarðarbær gera sérstakan samning við velferðarráðuneytið um rekstur hjúkrunarheimilisins. Hafnarfjarðarbæ er heimilt að fela þriðja aðila að veita þjónustu á grundvelli þess samnings, enda liggi fyrir staðfesting velferðarráðuneytisins, en ábyrgð sveitarfélagsins á samningsskyldum við ráðuneytið verður ekki framseld. Leggur starfshópurinn til að verkefnastjórn verði falið að undirbúa rekstur heimilisins og gera tillögu þar að lútandi til bæjarráðs. Skal verkefnastjórnin meðal annars skoða hvort grundvöllur sé til samstarfs við aðra framkvæmdaraðila sambærilegrar þjónustu, svo sem önnur sveitarfélög. Bæjarráð samþykkir fyrirliggjandi tillögu starfshópsins og felur bæjarstjóra að leita tilnefninga í verkefnastjórn um byggingu og rekstur hjúkrunarheimilis við Hádegisskarðs sbr. fyrirliggjandi drög að erindisbréfi og undirbúa störf erkefnastjórnar.
Fulltrúar Sjálfstæðisflokksins bóka eftirfarandi: "Bæjarráðsfulltrúar Sjálfstæðisflokksins samþykkja fram komna tillögu starfshóps, um að stofnuð verði verkefnastjórn sem undirbúi útboðsferli vegna byggingar nýs hjúkrunarheimilis, en gert er ráð fyrir að eftirfarandi atriði liggi jafnframt fyrir hið fyrsta:
1) Staðið verði við fyrri samþykktir skýrslu starfshóps frá 2006, og ítrekun starfshóps fjölskylduráðs frá 2012, um áframhaldandi þróun og uppbyggingu Sólvangssvæðisins, þar sem verði framtíð miðstöðvar öldrunarþjónustu í Hafnarfirði. Samið verði við ríkisvaldið um að þetta gangi eftir.
2) Gerð verði kostnaðargreining og lagðar verði fram rekstrarlegar forsendur fjárfestinga og stoðþjónustu sem munu tengjast nýju hjúkrunarheimili.
3) Gerð verði kostnaðar- og fjárfestingaráætlun vegna nauðsynlegra vegtenginga og stofnbrautar á svæðinu við hjúkrunarheimilið.
4) Fyrir liggi áætlanir um hvernig bæjarfélagið muni fjármagna hlut sinn í uppbyggingu og rekstri framangreindra atriða."
Fulltrúar Samfylkingar og Vinstri grænna leggja fram eftirfarandi bókun: "Fyrir liggur skýr stefnumörkun bæjarfélagsins um framtíðaruppbyggingu á sviði öldrunarmála og hefur um hana ríkt þverpólitísk samstaða og sátt. Var sú stefnumörkun yfirfarin af starfshópi fjölskylduráðs sem skilaði samantekt sinni í júní 2012. Í henni kemur fram að gert sé ráð fyrir að í tengslum við byggingu nýs hjúkrunarheimilis verði sú aðstaða sem til staðar er á Sólvangi, með tengingu við starfsemi heilsugæslunnar sem er í samtengdu húsnæði og nærliggjandi þjónustuíbúðum aldraðra, nýtt til uppbyggingar á miðstöð öldrunarþjónustu, s.s. á sviði dagvistunar, hvíldarinnlagna, endurhæfingar, sameiginlegri stjórnstöð heimahjúkrunar og félagslegrar heimaþjónustu og síðast en ekki síst upplýsinga- og ráðgjafaþjónustu fyrir aldraða."
Svar
Helga Ingólfsdóttir tók til máls. Þá Gunnar Axel Axelsson. Helga Ingólfsdóttir kom að andsvari. Gunnar Axel Axelsson svaraði andsvari. Þá tók til máls Rósa Guðbjartsdóttir. Gunnar Axel Axelsson kom að andsvari. Rósa Guðbjartsdóttir svaraði andsvari. Gunnar Axel Axelsson kom að andsvari öðru sinni. Guðrún Ágústa Guðmundsdóttir, bæjarstjóri, kom að andsvari við fyrri ræðu Rósu Guðbjartsdóttur. Rósa Guðbjartsdóttir svaraði andsvari. Guðrún Ágústa Guðmundsdóttir kom að andsvari öðru sinni. Guðrún Ágústa Guðmundsdóttir tók til máls. Þá Gunnar Axel Axelsson.
Helga Ingólfsdóttir tók til máls og lagði fram svohljóðandi bókun:
"Það er fagnaðarefni að undirbúningur við byggingu nýs hjúkrunarheimilis hefjist að nýju, en framkvæmdir hafa tafist um nokkur ár vegna þess að forval reyndist ekki löglegt, en sú staðreynd hefur legið fyrir í tæp tvö ár og sætir undrun hvers vegna meirihlutinn hefur ekki unnið áfram að undirbúningi verksins.
Nú þegar verkefninu er ýtt úr vör á ný eftir biðstöðu undanfarinna ára er mikilvægt að vanda til við undirbúning verksins og endurmeta upphaflegar forsendur.
Starfshópnum sem skilaði af sér til bæjarráðs sl. fimmtudag var falið af bæjarráði að skoða ólíkar leiðir við hönnun, byggingu og rekstur hjúkrunarheimis og koma með tillögu til bæjarráðs sem taki til þessa þátta.
Hópurinn var sammála um leiðir við hönnun og byggingu verkefnissins og þar sem ég tók fullan þátt í þeirri vinnu skrifaði ég undir niðurstöðu starfshópsins. Ég gerði hinsvegar fyrirvara við undirskrift mína sem er fylgiskjal við niðurstöðu starfshóps.
Ástæða fyrir mínum fyrirvara er ég geri athugasemdir við að starfshópurinn hefur ekki lokið verki sína varðandi rekstraþætti verkefnisins auk þess að ég tel mikilvægt að enduskoða þær forsendur sem lagðar voru til grundvallar verkefninu í stefnumótun frá árinu 2006 og skoða hver þróun málaflokksins sem varðar öldrunarþjónustu er varðandi þjónustuframboð og þar skiptir miklu máli að líta sérstaklega til staðsetningar en ljóst er að forsendur fyrir núverandi staðsetningu hafa gjörbreyst. Þessi sjónarmið settí ég fram í starfshópnum en þau fengu ekki hljómgrunn.
Þar sem málið hefur tafist töluvert væri ennfremur eðlilegt að gefa hagsmunaðilum aðkomu að því og fá umsögn frá fagaðilum sem sinna rekstri sambærilegra stofnana og þeim samtökum sem standa að öldrunarmálum í Hafnarfirði.
Þar sem verkefnið er skilyrt að hálfu ríkisvaldsins og öll ábyrgð og fjárhagsleg áhætta mun hvíla á sveitarfélaginu er nauðsynlegt að rekstrarlegar forsendur liggi fyrir við upphaf verkefnisins sérstaklega í ljósi fjárhagstöðu sveitarfélagsins og þeirra skýringa sem gefnar hafa verið vegna þeirra tafa sem orðið hafa á framgangi verksins um að óljóst sé hvort bænum er heimilt að fara í þessa skuldsetningu."
Helga Ingólfsdóttir, bæjarfulltrúi Sjálfstæðisflokks (sign)
Rósa Guðbjartsdóttir lagði fram svohljóðandi bókun:
"Vísað er til bókunar bæjarráðsfulltrúa Sjálfstæðisflokksins á fundi bæjarráðs 21. feb. sl. um málefni hjúkrunarheimilis og uppbyggingar á Sólvangi."
Rósa Guðbjartsdóttir (sign).
