Svar

Ágúst Bjarni Garðarsson tekur til máls. Rósa Guðbjartsdóttir kom að andsvari, einnig Ólafur Ingi Tómasson.

Guðlaug Kristjánsdóttir tekur til máls. Ágúst Bjarni Garðarsson kemur til andsvars.

Adda María Jóhannsdóttir tekur til máls. Til andsvars kemur Ágúst Bjarni Garðarsson. Adda María Jóhannsdóttir svarar andsvari. Ágúst Bjarni Garðarsson kemur til andsvars öðru sinni.

Jón Ingi Hákonarson tekur til máls. Til andsvars kemur Ágúst Bjarni Garðarsson. Jón Ingi Hákonarson svarar andsvari.

Fundarhlé gert kl. 15:40
Fundi fram haldið kl. 15:44

Samþykkt með 7 atkvæðum meirihluta og Miðflokksins. Aðrir bæjarfulltrúar sitja hjá.

Adda María Jóhannsdóttir leggur fram svohljóðandi bókun:

Frá upphafi þessa máls hafa fulltrúar Samfylkingarinnar gert athugasemdir við að Hafnarfjarðarbær myndi ekki sjá um uppbyggingu á knatthúsi og eiga það að fullu líkt og stefnt var að með samþykkt bæjarstjórnar á seinasta kjörtímabili. Eignarhlutur bæjarins í nýju knatthúsi er núll sem er eins langt frá því markmiði og hugsast getur. Á þeim grundvelli sitjum við hjá við afgreiðsluna.
Adda María Jóhannsdóttir
Friðþjófur Helgi Karlsson

Guðlaug Kristjánsdóttir leggur fram svohljóðandi bókun:

Á síðasta kjörtímabili náðist þverpólitísk sátt um að stefnt skyldi að því að bærinn myndi vera eigandi íþróttamannvirkja að 100%. Undirrituð er enn á þeirri skoðun að sú leið sé farsælust til framtíðar litið, ekki síst varðandi fjárhagsleg samskipti íþróttafélaga og bæjarins og rekstur félaganna til framtíðar.
Fortíðin geymir mörg dæmi um þunga skuldsetningu á eignum íþróttafélaga sem að lokum endar með þvinguðu inngripi sveitarfélagsins til björgunar. Það á við um fleiri en eitt félag. 100% eign bæjarins á mannvirkjum er ein leið til að fyrirbyggja slík áföll.
Undirrituð mun því ekki styðja þessi eignaskipti eins og þau liggja fyrir í dag.
Jafnframt óskar undirrituð eftir svörum við eftirfarandi spurningum, sem verði lögð fram í bæjarráði við næsta tækifæri:

1) Óskað er eftir upplýsingum um ferlið sem framundan er vegna uppgjörs í samræmi við rammasamkomulag bæjarins og FH.
2) Sérstaklega er óskað eftir upplýsingar um endanlegum tölum um verðmat einstakra húsa. Ljóst er að bærinn er hvorki að byggja né kaupa Skessuna, heldur kaupa önnur hús. Óskað er eftir samantekt á því hvernig heildarupphæð rammasamkomulagsins (790m) skiptist á hinar keyptu eignir.
3) Hvernig uppgjöri um þau er háttað (tengist sp. 2, um kaupverð).
4) Hvenær og hvernig eignum verði þinglýst á víxl milli aðila
Komið hefur fram að í dag á bærinn 80% hlut á móti 20% FH í Íþróttahúsinu/parkethúsinu, en í vinnu við rammasamkomulagið hefur verið reiknað með því að fullnustaður verði gjafagjörningur frá 1989 og húsið þar með fært að 100% í eigu FH, til þess svo að kaupa það aftur að fullu miðað við fram komið verðmat.
5) Spurt er hvenær sá gjafagjörningur verði fullnustaður og hvernig.
Hér spyr ég nánar um upphæðir, þ.e. hvert er bókfært verð 80% eignar bæjarins í dag. Hvenær og hvernig hún verði gjaldfærð og með hvaða hætti fullnustun gjafagjörningsins verði færð til bókar. Sbr. spurningu 2, hvert er nýtt kaupverð hússins og hvernig verður bókfærslan á því (kaup/eign).
Einnig er spurt um uppfyllingu annarra ákvæða í 8. grein samþykktarinnar frá 1989, þ.e. hvað varðar starfsmannahald og rekstur hússins o.s.frv. sem andlag við gjafagjörningnum.
6) Spurt er hvort í samþykki eignaskiptayfirlýsingar felist að samþykkja gjafagjörninginn sem um ræðir, frá 1989.
7) Einnig væri gott að fá yfirlit yfir stöðu uppgjörs samkvæmt rammasamkomulaginu, miðað við ársreikning 2019 virðist mér að ekki sé að fullu búið að greiða þá upphæð sem í samkomulaginu felst.
Hér vil ég bæta við spurningu um það hvort framkvæmdum við Skessuna er lokið og óska eftir því að endanlegt uppgjör vegna byggingarinnar verði lagt fram.
8) Á eftir að greiða lokagreiðslu á grunni rammasamkomulags?
9) Hvaða skref eru semsagt eftir í þessu ferli og hvernig verða þau stigin?
10) hver tekur saman minnisblaðið/svörin við þessum spurningum? Óska eftir að minnisblaðið sé undirritað.
11) er búið að aflétta veðum af þeim eignum sem færast samkvæmt eignaskiptayfirlýsingunni yfir á bæinn?

Guðlaug S Kristjánsdóttir
bæjarfulltrúi Hafnarfjarðarbæ